Все православные молитвы

Главная » Все молитвы » Молитва преподобному Симеону Столпнику

Молитва преподобному Симеону Столпнику.

Икона Образ Симеон Столпник

Симеон Столпник

Молитва преподобному Симеону Столпнику

Преподобне отче Симеоне! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.

Молитва вторая Симеону Столпнику

О, священная главо, преподобне отче, преблаженне авво Симеоне, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Тропарь преподобному Симеону Столпнику.

Тропарь, глас 1:
Терпения столп был еси, ревновавый праотцем, преподобне, Иову во страстех, Иосифу во искушениих, и безплотных жительству, сый в телеси, Симеоне отче наш, моли Христа Бога спастися душам нашим.

Кондак, глас 2:
Вышних ищай, нижним совокупляяйся, и колесницу огненную столп соделавый, тем собеседник ангелом был еси, преподобне, с ними Христу Богу моляся непрестанно о всех нас.

Икос:
Симеоново непорочное житие кий язык человечь довлеет когда к похвале исповедати? Обаче воспою, Божиею мудростию, добляго сего исполина страдание же и подвиги, яже на земли, яко светильника явльшася, всем человеком, многим терпением, в лице ангельстем возсиявша, с ними бо поя непрестанно Христу, воздержанием чистоту стяжа, моляся непрестанно о всех нас.

Величание:
Ублажаем тя, преподобне отче Симеоне, и чтим святую память твою, наставниче монахов и собеседниче ангелов.

Акафист преподобному Симеону Столпнику ...

Популярные молитвы:

Молитва Модесту Иерусалимскому
Молитва Геннадию Костромскому и Любимоградскому
Молитва Матроне Московской
Молитва Иоанну Новому Сочавскому
Молитва Афанасию Афонскому чудотворцу
Молитва Тихону Задонскому Воронежскому чудотворцу
Молитва Мартину Милостивому. Молитва форумиста
Молитва Иоанну Рыльскому
Молитва Пресвятой Богородице Колочская
Молитва Господу Богу о восстановлении самодержавнаго царства русскаго
Молитва Дамиану Печерскому

Все молитвы ...



^ Наверх